Al Nassr ត្រៀមលើកកូនប្រុសច្បង Ronaldo ឱ្យចូលលេងក្នុងក្រុមឈុតធំ
By Dany • 8 views
ក្លិប Al Nassr របស់អារ៉ាប៊ីសាអូឌីត កំពុងសម្លឹងមើលឱកាសនាំយក Cristiano Jr កូនប្រុសវ័យ ១៥ឆ្នាំរបស់ Cristiano Ronaldo ឱ្យឡើងទៅកាន់ក្រុមឈុតធំ ចាប់ពីរដូវកាល ២០២៦-២៧ តទៅ។ ផែនការនេះបង្ហាញយ៉ាងច្បាស់ថា ក្លិបចង់ជួយសម្រេចបំណងរបស់ខ្សែប្រយុទ្ធវ័យ ៤១ឆ្នាំ ក្នុងការបានលេងរួមជាមួយកូនប្រុសរបស់ខ្លួននៅលើទីលានបាល់ទាត់អាជីព។
ក្នុងរយៈពេលប៉ុន្មានឆ្នាំចុងក្រោយនេះ Cristiano Ronaldo ធ្លាប់បានបង្ហាញបំណងរបស់គេថា ចង់បញ្ចប់អាជីពបាល់ទាត់ដោយមានឱកាសលេងជាមួយកូនប្រុសរបស់គេម្តង។ នេះក្លាយជាក្តីស្រមៃធំមួយរបស់ម្ចាស់ពាន Ballon d’Or ៥សម័យ។
តាមរបាយការណ៍ពីប្រព័ន្ធផ្សព្វផ្សាយអារ៉ាប៊ីសាអូឌីត ថ្នាក់ដឹកនាំ Al Nassr កំពុងរៀបចំផែនការនាំយក Cristiano Jr មកអភិវឌ្ឍសមត្ថភាពនៅក្នុងក្រុមឈុតធំ ដើម្បីពង្រឹងអនាគតកីឡាករវ័យក្មេងរូបនេះ និងជួយបង្កើនបទពិសោធន៍ក្នុងបរិយាកាសបាល់ទាត់កម្រិតខ្ពស់។
ទោះបីជាមានគម្រោងលើកឡើងទៅកាន់ក្រុមឈុតធំក៏ដោយ កៅអីក្នុងជម្រើស ១១នាក់ដំបូងមិនមែនជារឿងងាយស្រួលសម្រាប់ Cristiano Jr ឡើយ ដោយគេនៅតែត្រូវការពេលវេលាអភិវឌ្ឍសមត្ថភាពបន្ថែម។
Cristiano Jr នឹងឈានចូលវ័យ ១៦ឆ្នាំ នៅខែមិថុនា ឆ្នាំ ២០២៦ ខាងមុខ ហើយគេបានឆ្លងកាត់ការហ្វឹកហាត់នៅក្លិបធំៗជាច្រើនរួមមាន Manchester United, Juventus និងបច្ចុប្បន្ន Al Nassr។ គេក៏ធ្លាប់តំណាងឱ្យក្រុមជម្រើសជាតិព័រទុយហ្កាល់អាយុក្រោម ១៦ និង ១៧ឆ្នាំផងដែរ។
ការនាំកីឡាករវ័យក្មេងឡើងទៅក្រុមឈុតធំ ត្រូវបានគេចាត់ទុកថាជាជំហានសំខាន់ក្នុងដំណើរអភិវឌ្ឍអាជីព ដោយអាចផ្តល់បទពិសោធន៍ក្នុងការប្រកួតកម្រិតខ្ពស់ និងរៀនសូត្រពីកីឡាករអាជីពមានបទពិសោធន៍។
ថ្វីបើ Cristiano Ronaldo នៅតែជាតារាដ៏សំខាន់ក្នុងលីគកំពូលអារ៉ាប៊ីសាអូឌីត និងជាអ្នករកគ្រាប់បាល់ឈានមុខគេសម្រាប់ក្លិប ប៉ុន្តែពេលវេលាអាជីពរបស់គេក៏កំពុងខិតជិតដល់ទីបញ្ចប់ផងដែរ។
ឪពុក និងកូនលេងក្នុងក្រុមតែមួយ គឺជារឿងកម្រណាស់ក្នុងពិភពបាល់ទាត់ ហើយផែនការនេះអាចនឹងក្លាយជាប្រវត្តិសាស្ត្រថ្មីមួយ ប្រសិនបើវាក្លាយជាការពិត ដូចករណី Rivaldo និង Rivaldinho ដែលធ្លាប់លេងជាមួយគ្នានៅក្លិប Mogi Mirim៕
