លោក Dave Leduc ប្រកាសត្រៀមត្រឡប់មកសង្វៀនវិញ ជាថ្មីម្តងទៀត!
By SK • 53 views
បន្ទាប់ពីឃ្លាតឆ្ងាយពីសង្វៀនអស់មួយរយៈ ក្រោយទទួលបានជ័យជំនះលើកីឡាករខ្មែរ ព្រំ សំណាង កាលពីថ្ងៃទី 05 ខែវិច្ឆិកា ឆ្នាំ2023 មកម្លេះ ពេលនេះ អតីតជើងឯកប្រដាល់លំដាប់ពិភពលោក Dave Leduc បានបង្ហាញសញ្ញាច្បាស់ថា គាត់កំពុងត្រៀមខ្លួនសម្រាប់ការវិលត្រឡប់មកកាន់សង្វៀនប្រយុទ្ធវិញជាថ្មី។
តាមរយៈសារដែលគាត់បានបង្ហោះ និងការបញ្ជាក់ដោយខ្លួនឯង Dave Leduc បានបង្ហាញអារម្មណ៍មិនអាចអត់ធ្មត់បានចំពោះការមិនត្រឡប់មកវិញបានទេ ដោយបាននិយាយយ៉ាងច្បាស់ថា
«ខ្ញុំមិនអាចរង់ចាំបានទេ ខ្ញុំនឹងត្រឡប់មកសង្វៀនវិញឆាប់ៗនេះ»
សារនេះ បានធ្វើឲ្យអ្នកគាំទ្រវិស័យប្រដាល់ និងគុនខ្មែរ មានការចាប់អារម្មណ៍យ៉ាងខ្លាំង និងកំពុងរង់ចាំមើលថា ការវិលត្រឡប់លើកនេះ នឹងកើតឡើងនៅពេលណា និងនៅសង្វៀនណា។
Dave Leduc ត្រូវបានគេស្គាល់ថាជាកីឡាករដែលមានបទពិសោធន៍ខ្ពស់ កម្លាំងខ្លាំង និងស្ទីលប្រកួតដ៏រឹងមាំ ជាពិសេសការប្រើក្បាច់ជង្គង់កែង នឹង ក្បាច់ក្បាលដែក ដែលធ្វើឲ្យគូប្រកួតជាច្រើនធ្លាប់បរាជ័យយ៉ាងឆាប់រហ័ស។ ការត្រឡប់មកវិញរបស់គាត់ មិនត្រឹមតែជាការត្រឡប់របស់កីឡាករម្នាក់ប៉ុណ្ណោះទេ ប៉ុន្តែជាការត្រឡប់ដែលអាចធ្វើឲ្យសង្វៀនប្រដាល់ក្តៅឡើងវិញ និងបង្កើនការចាប់អារម្មណ៍ពីអ្នកគាំទ្រទាំងក្នុង និងក្រៅប្រទេស។
បច្ចុប្បន្ននេះ មិនទាន់មានការបញ្ជាក់ជាផ្លូវការអំពីថ្ងៃខែ ឬគូប្រកួតដែល Dave Leduc នឹងត្រូវជួបប្រទះនៅការត្រឡប់មកវិញលើកនេះនៅឡើយទេ ប៉ុន្តែសញ្ញាដែលគាត់បានបង្ហាញ បញ្ជាក់យ៉ាងច្បាស់ថា ការវិលត្រឡប់ទៅកាន់សង្វៀនគឺជារឿងដែលកំពុងខិតជិតមកដល់។
អ្នកគាំទ្រគុនខ្មែរ និងអ្នកស្រលាញ់វិស័យប្រដាល់ទាំងអស់ កំពុងរង់ចាំមើលថា តើ Dave Leduc នឹងជ្រើសរើសគូប្រកួតណា? នៅប្រទេសណា? ហើយការត្រឡប់មកវិញលើកនេះ នឹងបង្កើតការផ្លាស់ប្តូរអ្វីខ្លះនៅលើសង្វៀនប្រយុទ្ធ?
សូមរង់ចាំការប្រកាសបន្ថែមក្នុងពេលឆាប់ៗខាងមុខ!
