គ្រូបង្វឹក Pep Guardiola នឹងរង់ចាំដល់ចុងរដូវកាល មុនសម្រេចថានឹងបន្តជាមួយ MCFC ឬចាកចេញ
By Dany • 13 views
Pep Guardiola នឹងពន្យារពេលដើម្បីសម្រេចអនាគតជាមួយ Manchester City
គ្រូបង្វឹក Pep Guardiola នឹងរង់ចាំដល់ចុងរដូវកាល មុនធ្វើការសេចក្តីសម្រេចថា តើគាត់នឹងបន្តដឹកនាំ Manchester City ឬអត់។
បច្ចុប្បន្ន គាត់នៅសល់កុងត្រា 1 ឆ្នាំទៀត ប៉ុន្តែបើទោះមានពាក្យចចាមអារាមជាច្រើនក៏ដោយ Pep Guardiola មិនទាន់សម្រេចចិត្តចុងក្រោយឡើយ។ គាត់ចង់វាយតម្លៃស្ថានភាពក្លិប និងអារម្មណ៍ផ្ទាល់ខ្លួន មុនធ្វើការសម្រេចចិត្ត។
គាត់ត្រូវបានរំពឹងថា នឹងពិនិត្យស្ថានភាពទាំងមូលនៅខែឧសភា បន្ទាប់ពីរដូវកាលបញ្ចប់ ដើម្បីវាយតម្លៃការរីកចម្រើនរបស់ក្រុម និងគិតអំពីជំហានបន្ទាប់។
មន្ត្រីក្លិប Manchester City ក៏គាំទ្រឲ្យគាត់មានសេរីភាពក្នុងការសម្រេចចិត្ត ដោយគ្មានសម្ពាធ ព្រោះទំនាក់ទំនងរវាងគាត់ និងថ្នាក់ដឹកនាំក្លិបនៅតែរឹងមាំ។ ពួកគេចាត់ទុកថា Pep Guardiola សមនឹងទទួលសិទ្ធិនេះ បន្ទាប់ពីបានដឹកនាំក្រុមឲ្យទទួលបានជោគជ័យយ៉ាងច្រើន។
នៅលើទីលាន Manchester City នៅតែប្រជែងពានក្នុងចុងរដូវកាល៖
- ពួកគេទើបឈ្នះ EFL Cup បន្ទាប់ពីឈ្នះ Arsenal នៅវគ្គផ្តាច់ព្រ័ត្រ
- កំពុងប្រជែងពាន Premier League
- បានឆ្លងទៅវគ្គ 1/4 ផ្តាច់ព្រ័ត្រ FA Cup ហើយនឹងជួប Liverpool
Pep Guardiola បានចូលរួមដឹកនាំ Manchester City តាំងពីឆ្នាំ 2016 ហើយបានបង្កើតសម័យដែលជោគជ័យបំផុតក្នុងប្រវត្តិសាស្ត្រក្លិប។
ក្នុងករណីដែលគាត់សម្រេចចាកចេញ ក្លិបក៏កំពុងរៀបចំផែនការជំនួសរួចហើយ ដោយមានឈ្មោះគ្រូបង្វឹកដូចជា Enzo Maresca, Vincent Kompany និង Xabi Alonso ត្រូវបានពិភាក្សា។
ទោះបីជាយ៉ាងណា សម្រាប់ពេលនេះ Pep Guardiola នៅតែផ្តោតលើការប្រកួតដែលនៅសល់ និងចង់បញ្ចប់រដូវកាលនេះឲ្យបានល្អ មុនសម្រេចអនាគតរបស់គាត់។
